Viačasłaŭ Sielach-Kačanski

Viačasłaŭ Antonavič Sielach (Sielach-Kačanski)
25.12.1885, Łahojsk, Minskaja hubiernia — 08.08.1976, Saŭt-Ryvier, Niu-Džersi

Biełaruski opierny śpiavak (dramatyčny bas-baryton), muzyčna-dramatyčny i teatralny dziejač.

Skončyŭ Maładziečanskuju nastaŭnickuju sieminaryju ŭ 1905 hodzie, Pieciarburhskuju kanservatoryju ŭ 1915 hodzie. Z 1913 hoda artyst teatra «Muzyčnaj dramy». Z 1915 hoda salist Maryinskaha teatra, dzie vykanaŭ partyi Hanca ŭ opiery «Kazka pra cara Sałtana», Barysa Hadunova ŭ opiery «Barys Hadunoŭ», Šakłavitaha ŭ opiery «Chavanščyna» M. Musarhskaha, Ihara ŭ opiery «Kniaź Ihar», Hryhoryja Hraznoha ŭ «Carskaj niavieście» i inš. Adnačasova ŭ 1916 hodzie pracavaŭ u Aleksandrynskim teatry. Śpiavaŭ sumiesna z F. Šalapinym.

Prezidyum Mastackaj siekcyi Inbiełkulta. 1926. Zleva naprava: siadziać K. S. Sierada, Julian Drejzin, Jazep Dyła, Anton Hrynievič, Mikałaj Ščakacichin, stajać Mikałaj Krasinski, Paŭlina Miadziołka, Viačasłaŭ Sielach, Flaryjan Ždanovič. Z 1924 hoda kiraŭnik muzyčnaj padsiekcyi Inbiełkulta, vykładčyk opiernaha i charavoha kłasaŭ Biełaruskaha muzyčnaha technikuma. Siarod jaho vučniaŭ byli Pihuleŭski, Niaborskaja, Aškinazi, T. Banačyč, Archipaŭ, a taksama niekatory čas u jaho vučyłasia vakału L. Aleksandroŭskaja. Arhanizatar Biełaruskaha studyjnaha choru ŭ 1926 hodzie, rearhanizavanaha ŭ 1928 hodzie ŭ Biełaruskuju dziaržaŭnuju kapełu (ciapier Dziaržaŭnaja akademičnaja charavaja kapeła Biełarusi). Hałoŭny režysior (i vykanaŭca roli Młynara) pastanoŭki ŭ BDT-1 upieršyniu na biełaruskaj movie opiery «Rusałka» A. Darhamyžskaha (14–15 maja 1927). Z 1927 hoda dyrektar BDT-1, zniaty z pasady pa abvinavačvańni ŭ «nacdemaŭščynie». Z 1930 hoda dyrektar Biełaruskaha teatralnaha technikuma, zahadčyk Biełaruskich dramatyčnych kursaŭ.

Z 1933 hoda ŭ Lieninhradzie, namieśnik dyrektara Opiernaj studyi imia Rymskaha-Korsakava, režysior Vandroŭnaj opiery Usierasijskaha teatralnaha tavarystva. Z 1937 hoda pracavaŭ va Ukrainie.

U červieni 1943 hoda viarnuŭsia na radzimu, kiraŭnik addzieła mastactva BCR i addzieła kultury i mastactva Biełaruskaj narodnaj samapomačy. Adnačasova kiraŭnik i hałoŭny režysior Minskaha haradskoha teatra. Razam z Todaram Lebiadoj pastaviŭ jaho pjesu «Zahublenaje žyćcio». Z 1944 hoda ŭ Bierlinie. U litaratury dajecca infarmacyja, što hetym časam V. Sielach sumiesna z M. Ravienskim stvaryŭ kancertna-estradnuju hrupu pry prapahandysckaj ustanovie «Vinieta».

Z 1950 hoda ŭ ZŠA. Zajmaŭsia arhanizacyjaj charoŭ i teatralnych hrup, ładziŭ kancerty i spektakli.

Aŭtar tvoraŭ carkoŭnaj muzyki, charoŭ i piesień na vieršy biełaruskich paetaŭ.